ରାଜେଶ କୁମାର ଲେଙ୍କା (ନିଆଳି):
ଗ୍ରାମାଞ୍ଚଳ ଗୁଡିକରେ ଲୋକ ମାନଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ଲାଗି ସରକାର କୋଟି କୋଟି ଟଙ୍କା ବ୍ୟୟ କରୁଥିବା ବେଳେ ତୃଣମୂଳ ସ୍ତରରେ ଯୋଜନା ଗୁଡିକର ସଠିକ ଭାବରେ କାର୍ଯ୍ୟକାରୀ ହେଉ ନଥିବା ଦେଖିବାକୁ ମିଳିଛି ଫଳରେ ପାନୀୟ ଜଳ ପ୍ରକଳ୍ପ ପାଇଁ ବ୍ୟୟ ହେଉଥିବା କୋଟିକୋଟି ଟଙ୍କା କେବଳ ଅପବ୍ୟୟ ହେବାରେ ଲାଗିଛି ।କଟକ ଜିଲ୍ଲା ନିଆଳି ବ୍ଲକ ଅନ୍ତର୍ଗତ ତିହୁଡ଼ି ଗ୍ରାମରେ ଲକ୍ଷ୍ୟାଧିକ ଟଙ୍କା ବ୍ୟୟ ରେ ପ୍ରତିଷ୍ଠିତ ପାନୀୟ ଜଳ ଯୋଗାଣ ପ୍ରକଳ୍ପ ବିଭାଗୀୟ ଅପରିଣାମ ଦର୍ଶିତାର ଏକ ନମୁନା ମାତ୍ର ।ନିଆଳି ର ତିହୁଡ଼ି ଗ୍ରାମରେ ପ୍ରାୟ ପାଞ୍ଚହଜାର ଗ୍ରାମବାସୀଙ୍କୁ ବିଶୋଦ୍ଧ ପାନୀୟ ଜଳ ଯୋଗାଣ ନିମନ୍ତେ ୨୦୦୯ ମସିହା ରେ ୫୦ ଲକ୍ଷ ଟଙ୍କା ର ବ୍ୟୟ ଅଟକଳ ରେ ଟେଣ୍ଡର କରାଯାଇଥିଲା ।ବିଭାଗୀୟ ଯନ୍ତ୍ରୀ ଓ ଠିକାଦାର ଙ୍କ ଖାମଖିଆଲି ମନୋଭାବ ଯୋଗୁଁ ପୁରୁଣା ପାଇପି ଓ ଖରାପ ଟ୍ରାନ୍ସଫରମର ବସା ଯାଇଥିବା ଗ୍ରାମବାସୀ ଅଭିଯୋଗ କରିଥିବା ସହିତ ପରୀକ୍ଷା ମୂଳକ ଭାବେ ମଧ୍ୟ ଥରେ ବି ଜଳ ଯୋଗାଣ ହୋଇ ନାହିଁ କିମ୍ବା ଜଳ ଯୋଗାଣ ପାଇଁ ପଏଣ୍ଟ ହୋଇ ନାହିଁ ବୋଲି କହିଛନ୍ତି ।ଜଣେ ଠିକାଦାର ଏହାର ମରାମତି କାମ କରିବା ପାଇଁ କାର୍ଯ୍ୟାଦେଶ ପାଇଥିଲେ କିନ୍ତୁ ସେ ଆଦୌ କିଛି କାମ ନକରି ୩ ଲକ୍ଷ ଟଙ୍କାର ମିଛ ବିଲ ପାଇଛନ୍ତି ବୋଲି ସାଧାରଣରେ ଚର୍ଚା ଜୋର ଧରିଛି ।ପ୍ରକଳ୍ପ ଦୀର୍ଘ ବର୍ଷ ଧରି ଅଚଳ ହୋଇ ପଡିଥିବା ବେଳେ ବିଭାଗ ପକ୍ଷରୁ ଏହାର ଆବଶ୍ୟକ ମରାମତି କରାଯାଉ ନାହିଁ।ଏପରିକି ପ୍ରକଳ୍ପ ର ଚତୁଃପାର୍ଶ୍ଵ ଏବେ ଅନାବନା ଘାସ ଜଙ୍ଗଲରେ ପରିପୂର୍ଣ୍ଣ ହୋଇଥିବା ଦେଖିବାକୁ ମିଳିଛି।ଅଚଳ ହୋଇ ପଡ଼ିଥିବା ବେଳେ ବିଭାଗୀୟ ଅଧିକାରୀ ଏବଂ ସରପଞ୍ଚ ଙ୍କୁ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ କୌଣସି ସୁଫଳ ମିଳୁନାହିଁ ବୋଲି ଗ୍ରାମବାସୀ ଅଭିଯୋଗ କରିଛନ୍ତି।ତେବେ ପ୍ରଶାସନ ଏହି ଠକେଇର ଭିଜିଲାନ୍ସ ତଦନ୍ତ ପାଇଁ ନିର୍ଦ୍ଦେଶ ଦେବା ସହିତ ଗ୍ରାମବାସୀ ମାନଙ୍କୁ ପାଇପି ଯୋଗେ ପାନୀୟ ଜଳଯୋଗାଣ ବ୍ୟବସ୍ଥା କରିବାକୁ ଗ୍ରାମବାସୀମାନେ ଗଣମାଧ୍ୟମ ଜରିଆରେ ନିବେଦନ କରିଛନ୍ତି।ରାଜ୍ୟ ତଥା କେନ୍ଦ୍ର ସରକାର ଗ୍ରାମାଞ୍ଚଳରେ ପାନୀୟ ଜଳ ଯୋଗାଣ ବ୍ୟବସ୍ଥା ଉପରେ ଗୁରୁତ୍ବ ଦେଉଥିବା ବେଳେ କଟକ ଜିଲ୍ଲା ର ଗ୍ରାମ୍ୟ ପାନୀୟ ଜଳଯୋଗାଣ ବିଭାଗ ଖାମଖିଆଲି ନୀତି ଆପଣାଇବା ଘଟଣା କ୍ଷୋଭର ବିଷୟ ହୋଇଛି।ତେବେ ଏ ଦିଗରେ ସରକାର କିମ୍ବା ଜିଲ୍ଲା ପ୍ରଶାସନ ର କେବେ ଦୃଷ୍ଟି ପଡୁଛି ତାହା ଦେଖିବା ବାକି ରହିଲା।